ອີງຕາມແຈ້ງເຕືອນໄພອາກາດໜາວຂອງ ກົມອຸຕຸນິຍົມ ແລະ ອຸທົກກະສາດ ເລກທີ 1202/ກອຕທ ລົງວັນທີ 15 ທັນວາ 2017 ລະບຸວ່າ: ມວນອາກາດໜາວເຢັນຈາກ ສປ.ຈີນ ມີກຳລັງແຮງເພີ່ມຂຶ້ນແຜ່ລົງມາປົກຄຸມ, ສົມທັບກັບກະແສລົມຕາເວັນອອກສຽງເໜືອທີ່ມີກຳລັງແຮງພັດປົກຄຸມຢູ່ທົ່ວທຸກພາກຂອງປະເທດລາວ ໃນໄລຍະວັນທີ 17-23 ທັນວາ 2017. ເຊິ່ງຈະເຮັດໃຫ້ອຸນຫະພູມອາກາດຫຼຸດລົງ 3-5 ອົງສາ ໃນແຕ່ລະພາກ ພ້ອມມີຝົນຕົກກະຈາຍ ແລະ ລົມພັດແຮງຢູ່ບາງທ້ອງຖິ່ນ, ໂດຍສະເພາະຢູ່ເຂດພູດອຍບັນດາແຂວງພາກເໜືອ, ແຂວງໄຊສົມບູນ, ເມືອງດາກຈິງ ແລະ ເພດພູພຽງບໍລະເວນ ອາກາດຈະໜາວເຢັນຫຼາຍ.

ສະເພາະແຂວງຜົ້ງສາລີ, ຫົວພັນ, ຊຽງຂວາງ ໃນວັນທີ 18-19 ທັນວາ 2017 ອຸນຫະພູມອາກາດຈະຫຼຸດລົງ 6-8 ອົງສາ ເຊິ່ງຈະເຮັດໃຫ້ອາກາດເຢັນຫາໜາວເຢັນຫຼາຍ ພ້ອມມີລົມພັດແຮງເປັນບາງໂອກາດ.

ດັ່ງນັ້ນ, ຈຶ່ງແຈ້ງເຕືອນເຖິງປະຊາຊົນບັນດາເຜົ່າ, ອຳນາດການປົກຄອງ ແລະ ອົງການຈັດຕັ້ງທຸກພາກສ່ວນ ຈົ່ງມີສະຕິກຽມພ້ອມຮັບມືກັບສະພາບການປ່ຽນແປງຂອງອຸນຫະພູມ, ອາກາດໜາວເຢັນຫຼາຍ, ເຊິ່ງອາດຈະມີຜົນກະທົບຕໍ່ສຸຂະພາບ ໂດຍສະເພາະແມ່ນເດັກນ້ອຍ ແລະ ຜູ້ເຖົ້າ ຂໍໃຫ້ນຸ່ງຫົ່ມໃຫ້ຮ່າງກາຍອົນອຸ່ນຢູ່ສະເໝີ, ພ້ອມທັງໃຫ້ຕິດຕາມຂ່າວພະຍາກອນອາກາດຈາກກົມອຸຕຸນິຍົມ ແລະ ອຸທົກກະສາດໃນໄລຍະ 2 ຫາ 4 ວັນຕໍ່ໜ້ານີ້


            

ວັງວຽງສ້າງຖະໜົນຄົນຍ່າງ ຕ້ອນຮັບປີທ່ອງທ່ຽວລາວ

   ແຫຼ່ງຂ່າວຈາກ ເມືອງວັງວຽງ ແຂວງວຽງຈັນ ລາຍງານວ່າ ຢູ່ວັງວຽງໄດ້ມີການສ້າງຖະໜົນຄົນຍ່າງຂຶ້ນມາ ເພື່ອຕ້ອນຮັບແຂກບ້ານແຂກເມືອງໃນໂອກາດປີທ່ອງທ່ຽວລາວ 2018.

ໂຄງການຕະຫຼາດກາງຄືນວັງວຽງ Vangvieng Walking Street ເປັນໂຄງການທຳອິດທີ່ໃຊ້ເວລາເກືອບ 2 ປີ ໃນການສຳຫລວດຊອກຫາເສັ້ນທາງໃນຂອບເຂດຕົວເມືອງວັງວຽງເພື່ອສ້າງ ແລະ ໄດ້ຮັບອະນຸຍາດຈາກອຳນາດການປົກຄອງເມືອງວັງວຽງ ແລະ ທຸກໜ່ວຍງານທີ່ກ່ຽວຂ້ອງເຫັນດີພ້ອມດ້ວຍພໍ່ແມ່ພີ່ນ້ອງຈາກຮາກຖານເມືອງວັງວຽງໃນຂອບເຂດພື້ນທີ່ເສັ້ນທາງຕະຫຼາດດັ່ງກ່າວທີ່ພ້ອມພຽງຮ່ວມໃຈກັນສ້າງໂຄງການນີ້ຂຶ້ນເພື່ອເປັນຈຸດສູນລວມ ແລນມາກ ແຫ່ງໃໝ່ໃຫ້ກັບນັກທ່ອງທ່ຽວທີ່ຈະເຂົ້າມາທ່ຽວມາຊື້ສິນຄ້າຫັດຖະກຳ ສິນຄ້າໂອດ໋ອບ ທີ່ເປັນການຜະລິດຈາກຄົນພື້ນບ້ານຮາກຖານ ແລະ ສິນຄ້າທີ່ນຳເຂົ້າຈາກຕ່າງປະເທດພ້ອມກັບສິ່ງຂອງທີ່ລະນຶກໃຫ້ໄດ້ໄປຝາກໄປຕ້ອນຂອງນັກທ່ອງທ່ຽວທີ່ຈະເຂົ້າມາພັກຜ່ອນໃນຍາມຄຳ່ຄືນ ແລະ ເພື່ອຮອງຮັບການຂະຫຍາຍຕົວຂອງການພັດທະນາເສດຖະກິດຂອງປະເທດແບບຫັນປ່ຽນໃໝ່ໃຫ້ສາມາດຮັບເອົານັກທ່ອງທ່ຽວທັງພາຍໃນແລະຕ່າງປະເທດທີ່ຈະມາພ້ອມກັບສານຕໍ່ນະໂຍບາຍຂອງລັດຖະບານໃຫ້ສອດຄ່ອງເສີມສ້າງລາຍຮັບແກ່ປະເທດຊາດຈາກການປະກາດໃຫ້ເປັນປີທ່ອງທ່ຽວລາວ 2018 ນີ້ ເຊິ່ງພິເສດໄປກວ່ານັ້ນໃນອີກບໍ່ດົນເມືອງວັງວຽງຈະມີການສ້າງສະຖານີພັກລົດໄຟຄວາມໄວສູງ ລາວ-ຈີນ ພ້ອມກັບການສ້າງທາງດ່ວນຈາກ ວຽງຈັນ-ວັງວຽງ ໄລຍະທຳອິດກໍ່ຈະໃຫ້ແລ້ວທັນໃນສອງສາມປີໃນຕໍ່ໜ້າຍິ່ງເຮັດໃຫ້ເປັນການສະດວກສະບາຍສຳລັບນັກທ່ອງທ່ຽວທີ່ມາຈາກທົ່ວທຸກມຸມໂລກເຂົ້າມາທີ່ວັງວຽງຈິ່ງຕ້ອງມີແຫຼ່ງທ່ອງທ່ຽວເພື່ອຮອງຮັບໃຫ້ພຽງພໍໃນຕໍ່ຫນ້ານີ້ເປັນໂຄງການໜຶ່ງທີ່ຢາກນຳສະເໜີໂຄງການຕະຫຼາດກາງຄືນຈະເປີດໃຫ້ຈັບຈອງໃຫ້ເຊົ່າພື້ນທີ່ທົດລອງຂາຍໃນວັນທີ່ 15-16 ທັນວາ 2017 ນີ້ ແລະ ຈະເປີດເປັນທາງການໃນວັນທີ່ 29 ທັນວາ 2017 ທີ່ຈະມາເຖິງພ້ອມກັບງານນາງສາວງາມໝາກກ້ຽງຫວານເມືອງວັງວຽງ ແລະ ເພື່ອເປັນການສະເຫຼີມສະຫຼອງປີທ່ອງທ່ຽວລາວ 2018 ນີ້

ດຳລັດວ່າດ້ວຍ “ການບັນເທີງ” ຫ້າມຕັ້ງຮ້ານບັນເທີງໃກ້ໂຮງຮຽນ ແລະ ອາຍຸຕໍ່າກວ່າ 18 ປີຫ້າມເຂົ້າ

ເມື່ອບໍ່ດົນມານີ້ ລັດຖະບານໄດ້ອອກດຳລັດໃໝ່ ວ່າດ້ວຍການບັນເທີງ ສະບັບເລກທີ 315/ລບ ລົງວັນທີ 2 ຕຸລາ 2017 ເພື່ອຄຸ້ມຄອງ ແລະ ຕິດຕາມກວດກາທຸລະກິດການບັນເທີງໃຫ້ມີຄວາມເປັນລະບຽບຮຽບຮ້ອຍ, ປອດໄພ, ໄດ້ມາດຕະຖານ ແລະ ເປັນເອກະພາບກັນໃນທົ່ວປະເທດ ໂດຍໃນນັ້ນມີການກຳນົດອາຍຸຂອງຜູ້ເຂົ້າໃຊ້ບໍລິການບັນດາຮ້ານບັນເທີງຕ່າງໆ ຕໍ່າກວ່າ 18 ປີແມ່ນຫ້າມເຂົ້າ ພ້ອມທັງກຳນົດມາດຕະຖານລວມຂອງສະຖານບັນເທີງ ບໍ່ວ່າຈະເປັນສະຖານທີ່ຕັ້ງ, ບ່ອນຈອດລົດ, ການຕົກແຕ່ງພາຍໃນ, ຄວາມປອດໄພ ແລະ ການໃຫ້ບໍລິການ ເປັນຕົ້ນ.

ການອອກດຳລັດດັ່ງກ່າວນີ້ ຖືວ່າເປັນບາດກ້າວສຳຄັນໃນຄວາມພະຍາຍາມທີ່ຈະຈັດລະບຽບຮ້ານບັນເທີງໃນທົ່ວປະເທດ ເຊິ່ງດຳລັດດັ່ງກ່າວມີຜົນບັງຄັບໃຊ້ກັບ ດິດສະໂກເທັກ, ໄນຄຼັບ, ພັບ, ສະແນັກບາ, ບາ, ຮ້ານຄາຣາໂອເກະ ແລະ ຄອນເສີດ ເປັນຕົ້ນ ເຊິ່ງບັນດາຮູບການຂອງຮ້ານບັນເທີງທີ່ກ່າວມາຈະລວມເຖິງບັນດາຮ້ານເຫຼົ້າເບຍທີ່ໃສ່ຊື່ວ່າ ຮ້ານອາຫານ ຫຼື ສະຖານບັນເທີງການແຈ້ງທົ່ວໄປນຳ.

ເນື້ອໃນສຳຄັນໄດ້ກຳນົດມາດຕະຖານຂອງສະຖານບັນເທີງ ໂດຍສະເພາະເລື່ອງຂອງສະຖານທີ່ຕັ້ງທີ່ລະບຸໄວ້ວ່າ ຕ້ອງຫ່າງໄກຈາກສະຖານສຶກສາ, ໂຮງໝໍ, ສຳນັກງານຂອງລັດ, ສຳນັກງານອົງການຈັດຕັ້ງສາກົນ, ສາສະນະສະຖານ ແລະ ສະຖານທີ່ສຳຄັນຂອງຊາດ ຢ່າງໜ້ອຍ 500 ແມັດ. ພ້ອມກັນນັ້ນ ສະຖານບັນເທີງທີ່ໃຫ້ບໍລິການເປັນປະຈຳຕ້ອງມີບ່ອນຈອດລົດເນື້ອທີ່ 600 ຕາແມັດຂຶ້ນໄປ. ມາດຕະຖານການປຸກສ້າງແມ່ນໃຫ້ໃຊ້ວັດສະດຸທີ່ມີຄວາມທົນທານ ແລະ ປອດໄພ ແລະ ໄດ້ຮັບອະນຸຍາດປຸກສ້າງ ຈາກຂະແໜງໂຍທາທິການ ແລະ ຂົນສົ່ງ. ນອກນັ້ນກໍຕ້ອງມີພະນັກງານຮັກສາຄວາມປອດໄພ ແລະ ມີລະບົບເຕືອນໄພ, ທາງໜີໄຟ ແລະ ອຸປະກອນປ້ອງກັນໄພຕິດຕັ້ງໃນສະຖານບໍລິການນຳ. ເວລາປິດໃຫ້ບໍລິການກຳນົດສູງສຸດເວລາທ່ຽງຄືນ.

ສ່ວນດ້ານຂອງຜູ້ເຂົ້າໃຊ້ບໍລິການຮ້ານບັນເທີງ ດຳລັດສະບັບນີ້ໄດ້ກຳນົດອາຍຸຕໍ່າສຸດ 18 ປີ ຖ້າຫຼຸດນີ້ແມ່ນຫ້າມເຂົ້າໃຊ້ບໍລິການ.

ການເຄື່ອນໄຫວຂອງລັດຖະບານໃນຄັ້ງນີ້ ຄາດວ່າຈະຊ່ວຍຫຼຸດຜ່ອນບັນດາຮ້ານບັນເທີງທີ່ບໍ່ໄດ້ມາດຖານ, ສ້າງສຽງລົບກວນຕໍ່ສັງຄົມ ລວມໄປຈົນເຖິງການໃຫ້ບໍລິການເຫຼົ້າເບຍຕໍ່ເດັກທີ່ອາຍຸຕໍ່າກວ່າ 18 ປີ ແລະ ການສ້າງສິ່ງກີດຂວາງໃນຖະໜົນຫົນທາງເນື່ອງຈາກບໍ່ມີບ່ອນຈອດລົດ. ທ່ານສາມາດອ່ານດຳລັດສະບັບເຕັມໄດ້ທີ່ນີ້.

ລັດກຽມກວດກາຄືນດິນທີ່ອະນຸຍາດໃຫ້ຕ່າງຊາດສຳປະທານ

        

ນັບແຕ່ກອງປະຊຸມສະໄໝສາມັນ ເທື່ອທີ 4 ຂອງສະພາແຫ່ງຊາດຊຸດທີ VIII ໄດ້ດຳເນີນແຕ່ວັນທີ 16 ຕຸລາເປັນຕົ້ນມາ ກໍນັບວ່າຫຼາຍບັນຫາເຄັ່ງຮ້ອນທີ່ສະມາ ຊິກສະພາແຫ່ງຊາດຕັ້ງຄຳຖາມເຖິງລັດ ຖະບານ ເປັນຕົ້ນແມ່ນການຈັດຕັ້ງປະຕິ ບັດແຜນພັດທະນາເສດຖະກິດ-ສັງຄົມ, ແຜນງົບປະມານແຫ່ງລັດ, ແຜນເງິນຕາ, ການແກ້ໄຂຜົນການກວດສອບ ແລະບັນ ຫາອື່ນໆທີ່ກ່ຽວຂ້ອງ ພ້ອມທັງເຫັນວ່າ ເປັນບັນຫາຮີບດ່ວນ ໜຶ່ງໃນນັ້ນກໍແມ່ນ ບັນຫາກ່ຽວກັບຄຸ້ມຄອງ ແລະ ນຳໃຊ້ທີ່ດິນອັນເປັນຊັບສົມບັດທີ່ຊົງຄຸນຄ່າຂອງຊາດໃນໄລຍະຜ່ານມາຂອງລັດຖະບານ.ຕໍ່ກັບບັນຫາດັ່ງກ່າວນີ້ໃນວັນທີ 23 ຕຸລາຜ່ານມາ ທ່ານ ທອງລຸນ ສີສຸລິດ ນາຍົກລັດຖະມົນຕີກໍໄດ້ໃຫ້ກຽດຂຶ້ນຊີ້ແຈງ ຕໍ່ທີ່ປະຊຸມບາງຕອນວ່າ: ສຳລັບການຄຸ້ມຄອງທີ່ດິນ, ການນຳໃຊ້ທີ່ດິນທີ່ເປັນຊັບສົມບັດແຫ່ງຊາດຂອງພວກເຮົາໃນ ໄລຍະທີ່ຜ່ານມາ ແມ່ນມີຫຼາຍອັນທີ່ສັບສົນ ແລະ ຜິດພາດຄວາມຈິງແລ້ວພວກເຮົາມີກົດໝາຍມີນິຕິກຳລຸ່ມກົດໝາຍ ແລະມີນະໂຍບາຍຈະແຈ້ງ ແຕ່ການປະ ຕິບັດກົດໝາຍນິຕິກຳກ່ຽວກັບບັນຫາທີ່ດິນຍັງມີຊ່ອງວ່າງຫຼາຍ ພາໃຫ້ການ ສວຍໃຊ້ໂອກາດເອົາລະບຽບການຕ່າງໆມາປັບປ່ຽນແອບແຝງໃຫ້ເປັນຜົນປະໂຫຍດໃຫ້ບຸກຄົນ ຫຼື ກຸ່ມຄົນທຸລະກິດ ຈຳນວນໜຶ່ງໄດ້ຮັບຜົນປະໂຫຍດແຕ່ວ່າລັດ ແລະ ປະຊາຊົນຈຳນວນໜຶ່ງບໍ່ໄດ້ຮັບຜົນປະໂຫຍດ.ຕໍ່ການປະຕິບັດດັ່ງກ່າວ ດັ່ງນັ້ນ, ໃນ ຕໍ່ໜ້າທ່ານນາຍົກລະບຸວ່າ ລັດຖະບານ ຈະໄດ້ນຳເອົາມະຕິກ່ຽວກັບທີ່ດິນມາ ຜັນຂະຫຍາຍໃຫ້ເປັນອັນລະອຽດ ເພື່ອ ຄຸ້ມຄອງທີ່ດິນໃຫ້ໄປຕາມກົດໝາຍຢ່າງ ເຂັ້ມງວດ ແລະບໍ່ໃຫ້ສວຍໃຊ້ທີ່ວ່າ ຫັນທີ່ ດິນ ຫັນຊັບພະຍາກອນໃຫ້ເປັນທຶນໄປໃນ ທາງທີ່ຜິດ ແລະເປັນການສວຍໂອກາດ ເຮັດໃຫ້ທີ່ດິນທີ່ເປັນຊັບສົມບັດຂອງຊາດ ເປັນວົງຄະນາຍາດແຫ່ງຊາດ ໄດ້ການ ນຳໃຊ້ຢ່າງສົມເຫດສົມຜົນ ແລະ ມີປະສິດ ທິຜົນສູງ ນຳຄຸນຄ່າມາສູ່ປະເທດຊາດ ແລະ ປະຊາຊົນແທ້ຈິງ.ພ້ອມດຽວກັນນັ້ນກໍຈະສ້າງກົນໄກຂຶ້ນມານີ້ໃຫ້ຮັດກຸມເພື່ອພັດທະນາທຸກ ການຊື້-ຂາຍດິນ, ການສຳປະທານໃດໆ ການຈັບຈອງຕະຫຼອດເຖິງການທຳລາຍຄຸນນະພາບຄວາມອຸດົມສົມບູນຂອງດິນ, ປ່າໄມ້, ແຫຼ່ງນ້ຳຈະຖືກແກ້ໄຂໄປເທື່ອລະກ້າວ ແລະ ອັນໃດເສຍພະຍາຍາມເອົາກັບຄືນມາ.ຂະນະທີ່ໃນໄວໆ ທ່ານ ທອງລຸນ ສີ ສຸລິດ ເປີດເຜີຍຕື່ມວ່າລັດຖະບານຈະອອກຂໍ້ກຳນົດການນຳໃຊ້ທີ່ດິນໃຫ້ຈະແຈ້ງລະອຽດກວ່າເກົ່າ. ຕ່າງປະເທດມາສຳປະທານຈະຕ້ອງໄດ້ເບິ່ງຄືນອັນໃດຜິດ ຫຼື ອັນໃດບໍ່ຜິດຖ້າຜິດຈະຕ້ອງໄດ້ແກ້ໄຂ ຖ້າຖືຕາມແນວທາງ ແລະ ຖືກຕ້ອງຕາມກົດໝາຍຈະຕ້ອງໃຫ້ສືບຕໍ່ນຳໃຊ້ຕໍ່ໄປແຕ່ຕ້ອງມີການຄວບຄຸມ-ຄຸ້ມຄອງ ແລະ ອື່ນໆ.